ಬದುಕು

ಬದುಕು ಮಾಯೆಯ ಮಾಟ ಯಾರ್ದಪ್ಪಾ ಈ ಆಟ

ತೋಟದ ಕೆಲ್ಸಕ್ ಜನ ಇಲ್ಲೆ, ಹಾಳಾಗ್ತ್ರೋ ತೋಟ

ಹೀಂಗೆ ಆದರೆ ಮುಂದೆ ಉಂಬುದ್ ಹೆಂಗೆ 

ಆಳಿಗೆ ಆಸ್ರಿ ಕೊಟ್ಟು ತೋಟದಲ್ಲೇ ಮಜ್ಜಿಗೆ ಕೊಟ್ಟು

ಬಪ್ಪಲಿವರೆಗೆ ಅವಂಗೆ ಊಟಕಾಗ್ತು

ಕೆಲ್ಸ ಎಂತು ಆಗ್ತಿಲ್ಲೆ ಆಳ್ ಲೆಕ್ಕ ಹೆಚ್ಚಾಗ್ತು

ನಾ ಮಾಡಿದ ಖರ್ಮ ಕೇಳವರ್ಯಾರು

ಕೊಳೆ ಮದ್ದು ತುಟ್ಟಿ ಆಯ್ದು ದಿನಸಿ ಅಂಗಡಿಲಿ ಕೈ ಸುಡ್ತು

ಹಬ್ಬ ಬಂದ್ರೆ ಸಾಕು ಬಯ್ಕಂಬ್ದೇಯಾ

ತರಕಾರಿ ತಿಂಬುದ್ ಬಿಡುದೆ , ಹಣ್ಣಂತು ವಿಷ ಅನ್ಸ್ತು

ಅನ್ನ ಕೊಡುವ ನಮಗೆ ಗತಿ ಇಲ್ಲಾ

ನಂಗಂತು ವಯಸ್ಸಾತು ಬೆನ್ ಗೂನು ಬಗ್ಗೋಯ್ದು

ಮನೆಯವಳು ಕೆಮ್ಮಿದರೆ ರಕ್ತ ಬತ್ತು

ದುಡ್ದೆಲ್ಲಾ ಕೊಟಿಗೆಗೆ, ಉಳಿದದ್ದು ಡಾಕ್ಟ್ರಿಗೆ

ಚಿನ್ನ ಮುಟ್ಟುಲಾಗ್ತಿಲ್ಲೆ ಕೈ ಸುಡ್ತು

ಮಾಣಿಗೆ ಮದ್ವೆ ಇಲ್ಲೆ, ಕೂಸೊಂದು ಸಿಗ್ತಿಲ್ಲೆ

ನಂಗ ಮುದಕರಾದುರೂನು ಮೊಮ್ಮಕ್ಕ ಇಲ್ಲೆ

ನಮ್ ಊರಲ್ಲಿ ಸಮ ಇಲ್ಲೆ ಒಬನ್ ಕಂಡ್ರ್ ಇನ್ನೊಬ್ಬಂಗ್ ಆಗ್ತಿಲ್ಲೆ.

ಏನು ಮಾಡುದು ಶಿವನೇ ಕರ್ಕತ್ತಿಲ್ಯಾ

ಕೂಸಂತು ಓಡೋಯ್ದು, ಎಲ್ಲಿದ್ದ ಗುತ್ತಿಲ್ಲೆ

ಅಳಿ ಮಾಣಿ ಯೆಂತ ತಿಂಬವ್ನೋ ಯಾವ ಜಾತಿಯೋ

ಪಕ್ಕದ್ ಮನೆ ಸುಬ್ಬಕ್ಕಂಗೆ ನೆಗ್ಯಾಡುದೆ ಕೆಲ್ಸ

ನಮ್ಮನೆ ಪ್ರಾಣಿಯ ಗೋಳು ತಡೆಯುದ್ ಹೆಂಗೆ

ಬ್ರೋಕರ್ ಶೆಟ್ಟಿ ಸತ್ತೋಗ್ಲಿ ದುಡ್ ತಗಂಡು ಕೈ ಕೊಟ್ಟಾ

ಮೂಗಿಗೆ ತುಪ್ಪ ವರಸಿ ಊರು ಬಿಟ್ಟಾ

ನಂಗಂತು ಮಗ ಇದ್ದ ನಾಲ್ಕ್ ಕಾಳು ಅಕ್ಕಿ ಹಾಕಗು

ಅವನ ಮುಂದಿನ ದಿನ ನೆನೆದ್ರೆ ಜೀವ ಹಾರ್ತು

ವನಮಹೊತ್ಸವ

ನಮ್ಮೂರಲ್ಲೂ ನಡೆದಿತ್ತು ಹೋದ ವರ್ಷ ವನಮಹೊತ್ಸವ
ಬಂದಿದ್ದರು ಮಂತ್ರಿ ಮಾಗಧರು ಬೀರುತ್ತ ಕಳ್ಳ ನಗುವ
ನೆಟ್ಟರು ಗಿಡಗಳ ತುಂಬಿದರು ಹೊಂಡವ,ಬಿಗಿದರು ಭಾಷಣವ
ಈ ಸಲವೂ ನಡೆಯುತ್ತಿದೆ ಆದರೆ ತುಂಬುವರು ಅದೇ ಹೊಂಡವ !

ಕಾಲೇಜು ಯುವಕ

ಅವನ ಮನವೇಕೋ ಹೊಯ್ದಾಡುತಿದೆ
ಅವಳು ನೋಡಬಹುದೆ ಇವಳು ನಗಬಹುದೆ
ಅವಳ ಗೆಳೆತನವೋ ಇವಳು ಜೊತೆಯಾಗಬಹುದೇ
ಇವಳು ಫೋನಾಯಿಸಬಹುದೇ ಅವಳು ಮೋಹಿಸಬಹುದೆ
ಅವರಿವರ ಎಲ್ಲರ ಬಗೆಗೆ ಚಿಂತೆ ದುಗುಡ ಆ ನವ ಯುವಕನದು

ಕೇಳಿದವನ ಗೆಳೆಯ, ಯಾರನ್ನು ವರಿಸುವ ತವಕ

ಹೇಳಿದನವ ,ಹಾಹಾ ಇದು ನನ್ನ ನಿತ್ಯದ ಕಾಯಕ

ಹೋಗಿ ಬರುವ ಚಂದದ ಹುಡುಗಿಯರಿಗೆ ನಾನಾಗುವೆ ನಾಯಕ

ವರಿಸುವ ಮಾತಿಲ್ಲ,ಬರಿ ನೋಟದಲ್ಲೇ ಎಲ್ಲಾ, ಕಾಲೇಜು ಮುಗಿಸುವ ತನಕ

ಕೂಸೆ

ನೋಡಿ ಹಿಗ್ಗಿದಳಾಗ ನೃಪಕುಮಾರನ ಕಂಡು

ರಾಶಿ ಹಿಗ್ಗಡ್ದೇ ಕೂಸೆ,ಹುಡ್ಕುದ್ ಕಷ್ಟ ಗಂಡು

ಕೋಮಲೆ ನೀ ಇರು ಸಪೂರ ಬಳುಕುವ ಬಳ್ಳಿಯಂತೆ

ಅವಳಿಗೋ ಗಾಳಿಗೆ ಹಾರಿ ಹೋದರೆ ಎಂಬ ಚಿಂತೆ

ಜಡೆ

ನನ್ನವಳ ಜಡೆ  ಬಹು ಸುಂದರ,ಕಾಣುವುದು ತ್ರಿವೇಣಿ ಸಂಗಮದಂತೆ

ಕೇಶರಾಶಿಯ ಬಿಚ್ಚಿದರೆ ಹಿಂದೆ ಬಚ್ಚಿಕೊಳ್ಳುವೆನೆಲೆ ನಾ, ಕಾಂತೆ

ಅವಳಿಗೋ ಉದುರುವಿಕೆಯ ಭಯ,ಜಡೆ ಹೆಣೆದುಕೊಳ್ಳುವ ಚಿಂತೆ

ಮಾಡಿಕೊಳ್ಳುವ ಆಸೆ ಚಿಕ್ಕ ಜುಟ್ಟವ ಮೋಡೆಲ್ ಗಳಂತೆ !!

ಹಣ

ಮನುಜ ಹಣವಿಲ್ಲದಿರೆ ಮನೆಯಲೆ ಗಡ್ಡೆ ತರಕಾರಿಯ ತಿಂಬ

ಹಣವಿದ್ದರೆ ಅದೇ ಗಡ್ಡೆಯ, ಪಂಚತಾರಾ ಹೋಟೇಲಲಿ ತಿಂಬ

ಮನುಜ ಹಣವಿಲ್ಲದಿರೆ ನಡೆದೇ ಹೋಗುವ ತಿನ್ನಲು ಆಹಾರ

ಹಣವಿದ್ದರೂ ನಡೆವ, ಕರಗಿಸಲು ಹೊಟ್ಟೆಯ, ತಿಂದ ಆಹಾರ

ಮನುಜ ಹಣವಿಲ್ಲದಿರೆ ಒಂದು ವಿವಾಹ ಆಗುವೆನೆಂಬ

ಹಣವಿದ್ದರೇ ಛೇ ಇವಳೇಕೆ ಮತ್ತೊಂದಿರಲಿ,ವಿಚ್ಛೇದನವೆಂಬ

ಮನುಜ ಹಣವಿಲ್ಲದಿರೆ ಹೆಂಡತಿಯೇ ಕೆಲಸದ ಸಹಾಯಕಿ

ಹಣವಿದ್ದರೇ ಕೆಲಸದ ಸಹಾಯಕಿಯೇ ಅವನ ನಾಯಕಿ

ಮನುಜ ಹಣವಿಲ್ಲದಿರೆ ತೋರಿಸಿಕೊಳ್ಳುವ ಬಹಳ ಶ್ರೀಮಂತನಂತೆ

ಅದೇ ಹಣವಿದ್ದರೆ ಬರಿ ಹೆದರಿಕೆ ತೋರ್ಪಡಿಸುವ ದಿವಾಳಿಯಂತೆ

ನೀನಾಗಿರೋ ಮನುಜ ನಿನ್ನಂತೆ, ಬಿಡು ಪರರ ಚಿಂತೆ

ಹಣವಿರಲಿ ಇರದಿರಲಿ ಗಳಿಸು, ಬಾಳು ನಿನ್ನೆಣಿಕೆಯಂತೆ

ಮರುಕ

          

ಯಾರವರು ಬಂದವರು ನನ್ನ ಮನೆಯಾಚೆ ನಿಂತವರು

ಯಾವ ಮಹನೀಯರವರು ಕದವ ತಟ್ಟುತಿಹರು

ಸರಿ ರಾತ್ರಿಯಾಗಿಹುದು ಮನೆಯವರು ಮಲಗಿಹರು

ನೆಂಟರೋ ಗೆಳೆಯರೋ ಫೋನಾಯಿಸದೇ ಬಂದವರು

ಯಾರಾದರಾಗಲಿ ನೋಡುವೆನು ಒಂದು ಸಲ

ಎನ್ನುತಲಿ ತೆಗೆದೆನು ಮನೆಯ ಹೆಬ್ಬಾಗಿಲ

ಎಲ್ಲೆಲ್ಲೂ ಕತ್ತಲೆಯು ಏನೂ ಕಾಣದು ನನಗೆ

ಗೂಬೆಯೂ ಕೂಗುತಿದೆ ಹೆದರಿಸುವ ಹಾಗೆ

ಗುರುತೂ ಸಿಗದ ಮಾನವನ ಆಕ್ರತಿಯ ಕಂಡೆ

ಕೇಳಿದೆನು ಯಾರಯ್ಯಾ ನೀನು ಏನಾಗಬೇಕು

ನಿಲ್ಲಲಾರದನವ ತೂರಾಡುತಿದ್ದವ ಕುಡಿದಿದ್ದು ಗುಂಡೆ

ಕೇಳಿದನು ಸ್ವಾಮಿ ಹೊಟ್ಟೆಗೆ ಏನಾದರೂ ಬೇಕು

ಒಂದು ಕಡೆ ಸಿಟ್ಟು ಇನ್ನೊಂಡು ಕಡೆ ಮರುಕ

ಯಾಕಯ್ಯಾ ಈ ರೀತಿ ಮಾಡುತಿಹೆ ಕುಡುಕ

ಮನೆಯಲ್ಲಿ ಮನವಿಲ್ಲವೆ ಬದುಕು ಬೇಡವೇ ನಿನಗೆ

ಹೇಳಿದನು ಯಾರಿಹರು ಈ ಲೋಕದಿ ಆಪ್ತರು ನನಗೆ.

ತಂದೆ ತಾಯಿ ಇಲ್ಲವಯ್ಯಾ ಹೆಂಡತಿ ಎಲ್ಲಿಹಳೋ ನನ್ನ ಮರೆತಿಹಳು

ಮಕ್ಕಳೋ ನನ್ನ ಬಳಿಗೆ ಬರಲೊಲ್ಲರು ಒಂಟಿ ಸಾಕೆನಗೆ ಬಾಳು

ಸಾರಾಯಿ ಸರ್ವಸ್ವ ದೇವರು ನನಗೆ ಹಿಂದಿಲ್ಲ ಮುಂದಿಲ್ಲದವಗೆ

ಮರೆಯುವೆನು ನೋವೆಲ್ಲ ಹೀರುತಲಿ ಜೀವಜಲ ಬೇಕೇ ನಿಮಗೆ !!!

ನಾನಂದೆ ಗೆಳೆಯಾ ಬಿಡು ಈ ಹಾಳು ಚಟವಾ ಏನಿದೇ ಸುಖ

ದಾರಿಗಳಿಹವು ಬಹು ವಿಧದ ಮರೆಯಲು ನಿನ್ನಯ ದುಃಖ

ಯಾರಿಲ್ಲವೆಂಬೆ ನೀನ್ಯಾರಿಗಾದೆ ಎಲ್ಲವನೂ ಮರೆತು ಹಾಳಾದೆ

ಜಗವ ನೋಡು ಗಳಿಸು ಜನರ ಸ್ನೇಹ ಬರಿತೆ ಮರುಗದೆ

ಆಯಿ

ನಾ ನಕ್ಕರೆ ನಗುವೆ,ನಾ ಅತ್ತರೆ ನಿನಗೇಕೆ ಸಂಕಟ
ತನಗೆ ಹಸಿವಿದ್ದರೂ ಹಾಲುಣಿಸಿದೆ, ಸಹಿಸಿದೆ ನನ್ನ ಕಾಟ
ಬಾಲ್ಯದಿ ಕಾಲಡರಿ ಬಿದ್ದವ ನಾನು ಅತ್ತಿದ್ದು ನೀನು
ಹೆತ್ತು ಹೊತ್ತ ಜನನಿ ನಿನ್ನ ದೇವರೆನ್ನಲೇ ನಾನು